Auleria Wakudumo
Elelo lodoolopa yaNgwediva otali ka wedela onhele yomangeshefelo ayo opo ovalandifi vomomapandaanda vahapu va mone eenhele momatala.
Omupopiliko welelo lodoolopa yaNgwediva Ottilie Shingenge okwa holola kutya elelo itali wedele ashike omatala ndele otali ka kwashilipaleka yo kutya ovalandifi otava ka landifa oilandifomwa yavo monhele ya yela nomwa andjuka nawa.
“Okutungulula omatala otaku yambula po eliko lodoolopa, nokulundulula onghalo yovalandifi vomomatala aNgwediva,” Shingenge ta ti.
Elelo lodoolopa otali ka wedela eenduda dovahondji voikutu, eenduda dovapandi novakululi osho yo ovalandifi voupana novoikulya imwepo.
Shingenge okwa holola yo kutya etungululo neyambulepo lomatala otali ka kwashilipaleka eameno lovalandifi osho yo ovalandi nokukwatela po ovatalelipo.
“Ngeenge omatala oku li pomufika wopombada nokwa yela, nena ovatalelipo otava kala ve na ohokwe okulanda kovalandifi vomomatala omodoolopa yaNgwediva nokuyambula po eliko lodoolopa,” Shingenge ta ti.
Shingenge okwa holola kutya elelo lodoolopa yaNgwediva ola kufa oshimaliwa momutengenekwafaneko woshimaliwa womudo 2024/2025 okutunga nokuwedela omatala mOngwediva.