Opolisi yaNamibia oya lopotelwa iipotha yomahepeko gomomagumbo yi li 4 400 okuza muApilili gwomumvo gwa yi sigo Febuluali gonuumvo, omwaalu ngoka tagu limbilike.
Omwaalu ngoka ogwa popiwa kukakukutu komatanga gopolisi Joseph Shikongo Etiyali sho kwa li kwa ningwa oshigongi shi na sha nomahepeko nankene ge na okukandulwa po, sha ningilwa koSwakopmund.
Shikongo kwa popi kutya iipotha mbyoka oyindji unene, tayi gandja omalimbililo onkene okwa pumbwa etokolo lya kola ndyoka tali kandula po iiningwanima yomahepeko momagumbo.
“Namibia okwa kala nokukambadhala okukandula po omahepeko momagumbo okupitila momikalo dha yooloka, shoka sha kwathele okuhwepopeka onkalo nonando inayi kala nawa thiluthilu,” ta popi ngaaka.
Ta ti epangelo otali tsikile okulonga nuudhiginini okuhwepopaleka onkalo yomahepeko mokati koshigwana.
Ta gwedha ko kutya omwaalu ohagu ulike kutya aantu yangapi ya taalela omahepeko nayangapi ya pumbwa omakwatho osho wo iitopolwa yini yi na oshigwana sha taalela omahepeko shoka natango tashi ulike wo monkalo moka mu na oshigwana.
“Omwaalu ohagu tu pe wo kutya oshitopolwa shini shi na aantu ye na omaupyakadhi, yangapi ya mwenena omahepeko nayangapi ya manguluka noyu uvite ko uuthemba wawo,” ta ti ngaaka.
Shikongo ta ti, oshilongo shika oshi na oompango nomalandulathano nkene omahepeko ge na okukandulwa po momagumbo osho wo esimano lyuuthemba womuntu.
Ta indile oshigwana shi kaleke po nokusimaneka oompango okukaleka po emanguluko nombili moshigwana.
Ta gwedha po kutya Namibia natango okwa longo nuudhiginini okuxwaxwameka uuthikepamwe shoka sha tula oshilongo shi ye ponkatu ombwaanawa yuuthikepamwe.
Omukuluntuwiliki mehangano lyoNamibia Statistics Agency (NSA) Alex Shimuafeni okwa ti, kehe onomola ya tumbulwa mpoka oya kalela po omuntu, mwa kwatelwa okanona, omumeme, omusamane osho wo kehe ngoka a ningi oshihakanwa shomahepeko.
“Onkene omatokolo getu naga kale gi ikwatelela komahepeko ga taalelwa kaantu mboka opo omahepeko ga hule po,” ta popi ngaaka.
Sha ikwatelela kuuministeli wuuthemba womuntu, Namibia oku li ponkatu ontihetatu muAfrica lyomutenya, noopelesenda 80,5.
Omaupyakadhi natango otaga holoka moshigwana ngaashi omakwatombyambyona nomakwatokoonkondo, omahokanitho gaanona aashona, na oyo oyimwe ya pumbwa okukandulwa po moshilongo natango.