ONDANGWA – Omauliko giipindi ngoka ga tamekele mehuliloshiwike sigo oompaka otaga ende nawa. Aashingithi ya yooloka mboka ya yi moonkundathana noshifokundaneki shika oya ti oongeshefa dhawo momauliko giipindi otadhi ende nawa.
Okuza esiku lyotango oya kala ye na omukumo kutya omasiku ngoka ga hupa ko otashi ka enda lela nawa. Rosalia Johannes ngoka ta landitha iikulya yOshiwambo okwa ti ookasitoma otadhi ende nawa, otaya pandula oshoka iilandithomwa yawo oya landwa lela. “Okutameka oshiwike shika onda inekela kutya ota tu ka landitha lela oshoka ookasitopma odhetu pe omukumo okuza esiku lyotango. Mboka haya anditha iikunwa oya kala noku tekulula shoka iikunwa ohayi pupo mbala,” ta ti ngaaka.
Ta hokolola kutya okuza esiku lyotango e ya momauliko giipindi gOndangwa, okwa landitha oshimaliwa sha kola. Johannes okwa ti omauliko giipindi oga zi ashike omasiku omashona ashike ota pandula kwaashoka a mono po sigo ompaka.
Cornelia Nghiyolwa ngoka naye ta landitha iikulya yOshiwambo okwa ti omauliko giipindi ogo ashike taga longithwa kaalandithi paife, oshoka olyo ethimbo aantu ya gongala pehala limwe.
“Aaluhe mpoka pena omauliko giipindi opo ndili oshoka oyendji ya za koondoolopa dho ko kule ngaashi kuushimba ohaya kala ya hala iikulya yoshiwambo, ngaashi omahanda , omagungu, uuushi nosho tuu,” ta popi ngaaka.
Omugandji gomauyelele melelo lyondoolopa yOndangwa Petrina Shitalangaho-Mutikisha okwa ti sigo oompaka oshigwana otashi gandja lela elongelokumwe lya sho. “Iimbuluma inayi holoka sigo onena, onkene elelo lyOndangwa otali pandula aakwashigwana ayehe molweyihumbato lyawo lyonawa, nasho tali tsikile okwiihumbata nawa,’’ ta pandula ngaaka.
Opolisi ndyoka hayi gandja olopota kehe esiku kombinga yiiningwanima tayi holoka moshitopolwa, inayi lopota sha oshiwinayi sha holoka. Nonando pwa kala omayikwatopomutima kutya omauliko giipindi ohaga etelele wo natango aafuthi oshowo iikwawo oyindji, inapu ya sha oshiwinayi.
Opolisi mOshana oya ti, otayi tsikile okulonga nuudhiginini, unene pethimbo ndika opo yi keelele iimbuluma kaayi holoke.
Shoka sha pumbiwa ombili, elongelokumwe nokunyakukilwa pamwe. [email protected]