Aanona yaamati yaali yomimvo hetatu oshowo 11 mboka anuwa ya kala noku kwatwa koonkondo ko mu mwayinagona gomumati gwomimvo 16, anuwa otaya pugalala neyilongo lyawo olya shuna monima.
Uunona mboka uyali anuwa owa kala noku kwatwakoonkondo uuna aakuluntu ya zi mo megumbo. Aayihe oye ya puuyelele sho okanona komimvo omugoyi keshi popi komukuluntu gumwe, nonando ya kala ya mbandamekwa kaaye shi popye.
Omukuluntu gumwe gwokanona okwa holola euvu nayi, ta ti shoka sha ningilwa omona kashi shi okwiindhindhimikilwa.
“Sho nda ndhengele kosikola, aalongi oya tseyithile ndje kutya eyilongo lyokanona olya shuna monima ko otaka pugalala mongulu,” ta popi ngaaka.
Ta ti, natango keshishi shoka tashi tokolelwa okamati hoka ka longo oshiningwanima shoka. Ta gwedha ko kutya oya lombwelwa ya ye koombelewa dhuuministeli wuuthike pamwe kOmuthiya.
Yinakulu yaanona ayehe yatatu ngoka a kala nokuutekula okwa ti, oshiningwanima shoka sha ningwa oshiwinayi, ihe keshi kutya ombepo ndyoka oya zi peni opo yi kwate omutekulu a longe iilonga yili ngaaka.
“Onda li nda tseyithilwa ku gumwe eli megumbo kutya okwa lopotelwa kokanona hoka komimvo hetatu kutya ohaya dhanenwa konima aluhe ngele aakuluntu ya zi mo, ihe okwa ti wa inaye shi popya oshoka oteya dhenge,” omukulupe ta hokolola ngaaka.
Ta ti, sho ya yi koshipangelo oshiwike sha zi ko, aanona mboka oya konaakonwa kundohotola, ngoka a koleke kutya oshili aanona oya kala noku kwatwakoonkondo.
Omukulupe okwa ti, aanona oya li ya pangwa etaya pewa ehungomwenyo.
Andreas Nampila mwene gwomukunda Oshiyagaya moshitopolwa shaShikoto okwa ti sho ayi moonkundathana nokamati hoka oka zimine kutya okeshininga shili.
“Onda li nde ka pula kutya okeshi ningi iikando ingapi. Nonando kali taka i patana tango, konima yethimbo okiitala kutya o keshiningi iikando oyindji,” ta hokolola ngaaka.
Omukuluntu gwopolisi moshitopolwa shaShikoto Teopolina Kalompo-Nashikaku okwa kumagidha oshigwana shi kale tashi lopota iiningwanima tayi ningilwa aanona momagumbo, opo ya kuthe onkatu yomeendelelo.
“Kehe ngoka taka holeka oshiningwanima sha ningwa megumbo, kutya ekwatokoonkondo, edhipago oshowo omahepeko galwe, naye otatu ke mu tula konima yekumba,” ta popi ngaaka.
Ta kumagidha kutya oshigwana inashi kala shi na uumbanda okulopota sha kopolisi.
Aavali oya kala noku nyenyeta kutya inaya manguluka we okuthiga aanona momagumbo naakwanezimo oshowo aaniilonga.
Oya li ya nyenyeta ngaaka okupitila komalungula oshowo miikundaneki ya yooloka sho kwa kala noku lopotwa omakwatokoonkondo ogendji moshilongo. Omugandji gomauyelele mUuministeli wuukashikekookantu Lukas Haufiku omumvo gwayi okwa li a fatulula kutya omakwatokoonkondo ohaga holoka nomatompelo ga yooloka.
Ta ti, shoka otashi vulu okushonopala nenge okuhula po uuna oshigwana tashi tsikile okulongwa nokufatululilwa kombinga yuuthemba wawo, nokutseya shoka ye na okuninga uuna ya longelwa omiyonena dholudhi ndoka.